Os Andares

Unha viaxe sonora é unha película na que ti es a protagonista, paseas por entre as localizacións e a cámara son os teus ollos. Un grupo de artistas do teatro, o cine documental, a poesía e a música producimos 6 creacións de audio nalgúns dos espazos máis máxicos da Serra dos Ancares. Seis capítulos, cada un escrito por unha autora, nos que se mestura o documental e a ficción, co fin de profundizar un pouco no coñecemento desta Reserva da Biosfera, a súa cultura e os sentires dos seus habitantes. O que tes que facer para disfrutala é moi sinxelo: 1) Colle o teu móbil (ou similar) con batería suficiente 2) Leva os mellores auriculares que teñas 3) Vai ata o punto de inicio da viaxe que escollas 4) Dalle ao play no idioma que prefiras 5) Déixate guiar Ao igual que no cine ou no teatro, é moi importante que cada viaxe se faga toda seguida sen falar con ninguén. Recomendámosche levar un calzado cómodo, unha gorra para protexerte do sol e poñer o teu móbil en modo NON MOLESTAR, así seguirás tendo conexión pero non che molestarán as chamadas nin as notificacións durante o tempo do paseo. Por último, os Ancares é un espazo protexido cun valiosísimo patrimonio histórico, cultural e natural. Tanto nos desprazamentos como durante a túa estancia alí, pedímosche que respectes a calma do lugar e que coides da fauna e da flora.